بنتحجج بأى كلام يعيد لحظة لـُقا تاهت
ونتفاجيء بإن كلامنا من طول البعاد باهت
ويفضل في الحنين كلمة ولا بتسكت ولا اتقالت
.
.
.
ويبدأنا الكلام بسؤال
عن الاخبار وأحوالنا
حروف اجابتنا بالمللى بنفس اللفظ والمعنى
تمام الحمد لله ع الحياه ـ عايشين
ويرسم صمت ملامحنا عتاب وحنين
نعود للذكرى ونسلّم ـ ونتألم
يكون الصمت على آخره . . فنتكلم
ونتفاجىء
بأن كلامنا من طول البعاد باهت
وان الحلم في لقانا ضمير ساكت
ونتسابق يامين يوصل
حدود الذكرى قبل التانى يحكيها
وتسكن فينا اوجاعها وتسرح فينا حكاويها
ونتنهد ويرجع صبرنا للصمت
وينهينا الكلام بوداع بنفس اللفظ والمعنى
ونفس الكبت
ـ قوام الوقت بيعدي ـ ترد تقول سرقنا الوقت
ونتفرق على وعد اللقا تانى
نعيد لحظة لقا تاهت
*****
احمد البوهي
12 comments:
كلام رقيق ومشاعر مرهفة ...حلوة قوى ربنا يوفقك
ديما بقرأ كلماتك
وديما برفعلك القبعه احترما
بجد كلمات جميلة جداااا
فنان ومتألق ديما يابوهي
:D
وحشتنا
و وحشنا كلامك الرقيق
زى قلبك
لازالت كلماتك تدهشني وتمس احاسيس وجداني بابعادها اللامتناهية فتخلق جوا شعوريا متفردا لا يمت للواقع بصلة
دمت مبدعا يا أبيه
انفع انفع؟؟
:))
مش دي هي هي اللي كانت هناك؟ انت نقلتها هنا والا لطشتها من البوهي اللي هناك؟
"ويفضل في الحنين كلمة ولا بتسكت ولا اتقالت"
باسافر لما اقرالك واحس بحنين المسافرين لاهلهم واصحابهم ويوحشونى كمان ..وانسى انى فى مكانى لا رحت ولا جيت
كلامك مركب ورق بتودينى وترجعنى ..
يارب تلاقى مركب ترسيك على بر يا بوهى
دمت مبدع فى وصف ارق المشاعر بابسط الكلمات
ايه ده بقيت بقول شعر ههههههههههههههههه
تسلم يا بوهى بجد
الحمدلله على سلامتك وفعلا للحنين كلام لو نطق بيه يتكتب في كتب ودواوين شعر...كلماتك رقيقه للغاية فلا تحرمنا إياها
جميل ما تقول
الله حلوة اوي اية دةة
بجد لا تعليق زي الكومنتات بظبط
أسرة منتدى زبد البحر يتمنى منكم التواجد معنا في منتدى عالم المدونيين والمدونات
http://mhg1962.ba7r.org/forum.htm
Post a Comment