Tuesday, September 18, 2007

اطلالة من شرفة انكساراتى


.
.


الــدّوار
.
.



فى قرية شنجى برنجى
قابلت واحد كلمنجى حلنجى
لكن انسان

بيقول انا حاوى
راجل غلباوى
وغاوى وناوى
اوصل بالكلمة لكل مكان

ولقيته بيبكى
وعمّال يحكى
عن الاحساس بالغربة ويشكى
وماشى يدّور عالاوطان
ويهأهأ يضحك
يرقص ينهج
يرجم خوفه مع الاحزان

وولاد القرية بيجرو وراه
ومعاه كام دفتر
حتى العمده ويّا العسكر
وعويضة ابن العمدة كمان
ويّاه سجّان

الكل بيجرى ورا الكلمنجى
ويلفت وشه يقول هأوأو
بردو انا حاوى
راجل غلباوى
وغاوى وناوى
اوصل بالكلمة لكل ودان

ولقيته فى ثانيه
اختفى وادّارى
والرجالة يعسو عليه
والعمده بيصرخ جاتله الحاله
اتشغلم بيه
كلمنجى بيضحك
يضحك ليه؟
روحو شوفو عنيه
هتلاقو الحزن ملاها دموع
هتلاقو الجوع كان قاسى عليه
تفتكرو ايه هو الموضوع
والموضوع ايه ؟
وحكاية الدفتر ايه والعسكر
وعويضه ويّا السجان؟

وسؤال بيزأزأفى الازهان
كلمنجى فين هو يا جدعان
ولمحت بعينى شجرة توت
اتهزت بعدها هس سكوت
كلمنجى هنااك
كان بيغنى ويتحدى الموت
كان بيقول ان الموت ده جبان

مسكين.. كان لاقى الغنا ساتره
بين الالحان
ودموعه مغطيه دفاتره
والكلمة ميزان
.
.
وسمعت صويت
وصراخ فجريت
اتاريه العمده شالوه للبيت
وشالوه خلصان

كلمنجى كمان
كان بيغنى فى آخر موال
ووصية لكل ضمير انسان

ومسكت دفاتره السريه
وقريت اشعار
وكلام عن لص وحراميه
وكمان اسرار
عالعمده وعاللى مع العمده
وعن الدّوار
اتارييه ما استحملش الصدمة
وفطس منهار
العمده الكلب الخاين بان
العمده اهو بان

ونويت بصراحة افتش سره
واقول وازيع اللى قريته
وفى وسط العزا اقراه كله
دا انا هبقى جبان لو خبيته
واستاهل حتى اللوم والشوم
.
.
..وصحيت من النوم
على صوت ملعون
بيقول ما تقوم
شكلك وخمان
انا قلت كمان..؟
حتى الاحلام محروم منها
اصحى و معرفش اكملّها
كوابيس ومفيش
للحلم.. امان
ونهايته صحيت مالنوم مخنوق
على قلة زوق
وصحيت قرفان

اتارينى مشغل تلفزيونى
وتهت فى نومى
ليلة امبارح
تهت وسارح ويّا خيالى
ياللى فى باللى
لواصحى فى يوم
الاقيك خلصااان
وفتحت التلفزين من تانى
عشان ينسانى
كابوس الحلم
اتاريتى فى علم
مش استغفال
قال ايه قالو ايه
..نكّسو اعلام
وجنازة وكام
مليون ماشين على عرض وطول
انا قلت هناااام
طول الايام
افضل نايم
احسن على طول
ده النوم سلطان
النوم سلطااااااان
خخخخخخخخخخ

Friday, September 7, 2007

تنهيدة فى مشوار الصبر

عذراً





فلقد تيقنت الآن والآن فقط
ان للانكسارات رونق خاص
وبريق يجذبنى اليه
ونشوة تسرى داخلى
فأنا انهل من اشجانى بنفس القدر الذى يجعلنى قادرا
على التبسم فى وجوه الآخرين




*****



ذكريات الغد



لثّم صمتك
واخفى ملامح وشك كله
خلف سواد الليل
ارسم صورة فى لوحة وهمك
صورة تجسد كل ملامحك
بالتفاصيل

ركّز اكتر
عالتجاعيد المنحوتة المكبوتة فى وشك
واياك تنسى الحسنة السودة المركونة على رف شفايفك
خايف؟

..عارفك..
مع انك مش ضامن عمرك
خايف من بكرة
على فكرة
لو تفضل خايف كده على طول
هتضيع معانيك فى طريق مجهول
ويطول وياك حزن الايام
وتسلم نفسك للاوهام
واللون مخطوف
وفى مد الشوف جواك
هتخاف وتغمض عينك
مش هتشوف
غير عتمة ضلمة يا دوب تسمحلك
ترسم صورة فى لوحة وهمك

خايف؟
..عارفك..
هش..وأمانيك كلها ماتت
احساسك ..مات
وزمانك..فات
ومدار الشك اللى فى بالك
حواليك بيطوف
وآثار البسمة اللى فى وشك
ماتت مالخوف
..
ماتت مالخوف
لساك خايف؟؟

Saturday, September 1, 2007

ولعلها آخر الانكسارات

مسخ لبشر



سلمت نفسك للغرور
ولمحت روحك وارتبكت
بصيت لقيت نفسك وحيد
ولكل حاجة خسرت
صابك آلام وشجون
وهمس ظنون
ولا لطش عقلك جنون
قلبك حجر
مسخ لبشر
صورتك بتتهز بوتر
لونك بيتحول فى لحظة
لكل لون
وعنيك بيعشقها الغموض
لما ببصلها ببرود
من غير كلام بلقى الردود
وبشوف طريقك للسفر
موهوم وباصص للقمر
بصيت لفوق وطمعت
بصيت لفوق فوقعت
نبضك هرب
احساسه فر
جواك صراع بين خير وشر
بتقول برىء
والاقيك جرىء
وكتيييييير تخون
ضاع الطريق منك وضعت
تاهت عنيك وياه وتهت

ومن الامل مليت فمت
...
ومن الامل مليت فمت