Monday, April 19, 2010

يمكـــــــــــــــــــــــــن






مبقتش فاكر
غير يادوب البسمة في عيونِك

والحلم بيسافر لحد الموت
ولا يرجعش

مبقتش فاكر ليه عيوني من الألم
ساكته مابتدمعش

يمكن يكون قلبنا بقى زيه زي الصخر

من امتى كان الموج بيخاف يعيش في البحر؟

من امتى كان الحب بيآمن بفعل السحر ؟

انا كنت مركب ورق مايشلش غير قلبين

تايه في بحر الحنين والموج بيحدفني

مبقتش حاسس بغربه وده اللي خوّفني

تفتكري يوم الرجوع هتردلي روحي ؟

ولَا في يوم الرجوع هتزوّدي جروحي ؟

؟
؟

خايف أخاف منك

وافضل احبك بضعف ومن بعيد لبعيد

من امتى خانّا الحنين
وصبح في صبره عنيد ؟

من امتى عشق الذكريات
بيعوّض القلب الحزين
عن نبض بيخليه سعيد ؟؟

من امتى سيبنا الوقت يسرقنا؟

وضعف الحلم فرّقنا

وطيفنا بيبتدي يسكن ملامح خوفنا م الاحلام

من امتى انا وانتي ابتدينا نخاصم الايام ؟

يمكن بقالنا زمان
والوقت فاق الحد

يمكن ما بينّا
لكن كلام ع الأد

يمكن ويمكن أوى...... مبقتش فاكر بجد






احمد البوهي

8 comments:

صمت المشاعر said...

كلمات مؤثره جدا

دمت بكل يخر

يا مراكبي said...

تحفة التحف بجد

برافو برافو برافو

آيــة said...

غمقان

د. إيمان مكاوي said...

موجعة أستاذ أحمد
تحياتي لحرفك

كلمات من نور said...

الحمدلله على السلامة ............كلام رائع يدخل إلى القلب بسهولة ...تحياتي

Anonymous said...

حلوة جدا القصيدة دى وإحساسها عالى جدا يمكن لو كنت قرأتها من غير ما اسمعها منك مكنتش سابت الإحساس دا لكن لأنى سمعتها بجد روعة
نور

زهرة said...

حلوة اوى يا أستاذ أحمد

بحييك عليها بجد

lara said...

مبقتش فاكر ليه عيوني من الألم
ساكته مابتدمعش

جميلة جدا جدا..تسلم ايدك وفكرك