Friday, May 30, 2008

أأسافر ؟؟؟؟؟؟؟؟؟؟


فلسفة التفرد والتردد والقرار .. !؟
ــــــــــــــــــــــــــــــــــــــــــــــــ









مين انت فى بحر الحياه

غرقان لشوشتك ؟

ولا ّ بتصارع لـُقا حلم الجنون

مين راح تكون؟

صّياد وسنّارة وشبك ؟


ولا ّ انشبك .. قلبك

بأوجاع الشجون

مين راح تكون؟

.
.

دا الشعر ... داااااااء

مَد البصر فى البحر بيصيب الانتهاء

عند البداية المُخجـِلة

صيّاد وعايش فوق خمول الأمنيه

صيّاد ورق

والمرسى ايه ؟
غير رمل ساكن صمته مستسلم جبان

والحلم ايه ؟
غير رجفة الخوف والامان
والضلمة ايه ..؟
غير جرح بيصيب السكون

مين راح تكون ؟؟

دا الملح عُمره ما يبقى حبر

مين راح تكون؟
.
.

مركب ورق .. قارب نجاه

مايشيلش غير قلبين وبس

او بالكتير قلبين وحبّارة وورق

او بالكتير .. حلم الحياه
.
.
ــــــــــــــــــــــــ
ــــــــــــــــــــــــ
ـــــــــــــــــــــــــ
ـــــــــــــــــــــــــ
ـــــــــــــــــــــــــ
.
.
وفى أغلب الأوقات بتـووه

وسط الهموم والممكنات

والصعب حلم

بيبتدى وقت الممات

وكتير بيحكمنى السكات

وقت الخطر

موصوف لأمثالى السفر

والخوف طريق

عايش على الموت بالبطىء
وخيال ضمير

او بالكتير

بقايا من مركب ورق



ـــــــــــــــــــ




عالهامش
ــــــــــــــ

لم أكن أعلم أن السفر تحول من كونه وسيله الى هدف...!!؟
ولم أكن أتصور عندما استشير الاخرين .. أجد الاجابة حاضرة سريعه ......( ساااااااااافر).. دى فرصة

لم أعد أعرف سأمكث هنا .... ام ستكون الطائرة هى آخر ما يرسى عليه عطاء وعناء التفكير؟؟؟
لم أعد أعرف ..؟




احمد البوهى
ـــــــــــــــــــ

40 comments:

بنت أبيها said...

لون جديد على تدويناتك المعتادة

بالنسبة لقصة السفر

كتير دلوقتي فعلا السفر اصبح هدف .. وحاجة يغتنمها

وكتير كل همه يسافر ..وحاطط في دماغه ان السفر هيحل ليه كل مشاكله

لكن مفيش احسن من الاستخارة والاستشارة

بالتوفيق

walaa rizk said...

حلوه اوى القصيده

وبجد الاحساس فيها عالى اوى

نفسك اللى انت بتتسأل عنه

انا نفسى اعرف ليه اجابه

الله عليك والله

هشام علاء said...

عزيزى احمد

و صفت بكلماتك الرائعة الحيرة و التردد فى الاختيار الذى نمر به جميعا

البقاء ام الرحيل

تعرف ان انا مريت بنفس المرحلة دى

وي يمكن لسه بمر بها حتى الان

و لكن خفت حدتها قليلا

هل تعرف لماذا خفت حدتها؟

لانى لقيت اصدقاء مثلك استطيع ان اتواصل معهم

بعد ان تركنى معظم اصدقائى و سافروا

بعد ان كان لى بدلا من الصديق عشرة

و كنا شلة كبيرة

فى خلال العام و نصف السابق فقط

فقدت منهم ثمانية اصدقاء اعزاء الى قلبى

و اصبحت اتذوق معنى الوحدة و الغربة فى بلدى

لم يتبق لى الا ثلالة او اربعة اصدقاء لم يسافروا و انا كانوا مازالوا يشاورون عقلهم

ثم ظهرت سيادتك ومشروع مدونات مصرية للجيب

و بدأت اشعر ان لسه فى امل اكون صداقات جديدة

صداقات بمعنى الكلمة

و لكن ها انت ايضا بتندهلك النداهة

لا اعلم اذا كان البوست مجرد و صف لحالة السفر و التردد بكلماتك الرائعة
ام

انه يعبر بالفعل عن واقع تجربة تمر بها الان

ف كل الاحوال اتمنى ان تتخذ القرار الذى يكون فيه الخير لك

و لا تنتظر منى ان اخلصك من حيرتك و ترددك

حيث ان العبد لله مازال يعيش نفس حيرتك و ترددك

و لكن رما بمقدار اقل و حدة اخف

عامة انا اتمنى لك كل خير ايا كان قرارك

فى الروابط التالية مواضيع كنت ناقشت فيها فكرة السفر و الهجرة من مصر المحروسة و فكرة الاختيار

ارجو ان تطلع عليها فربما تخلصك من حيرتك

و ربما ايضا ..تزيدها

1

حوار افتراضى مع صديقى المغترب


2

هل تستطيع الهجرة من مصر المحروسة؟


3

غربة ام انتماء؟


4

الاختيار


لا ادرى لماذا يكتب علينا دائما ان نختار بين الغربة داخل الوطن او خارجه


تحياتى و محبتى
هش

عصفور المدينة said...

يابني انت ظلمت القصيدة بوضعك موضوع السفر معها

بجد جميلة جميلة

مايشيلش غير قلبين وبس

او بالكتير قلبين وحبّارة وورق


بص يا أحمد أنا ضد السفر بشكل عام
ولكن هو حقيقة مشروع ولابد من دراسة جدوى له ووضع المميزات والعيوب والاحتمالات كلها أمامك مكتوبة والذي يشير يشير بناء على أرقام وأيضا أذكرك بالاستخارة

واصطنعتك لنفسي said...

اتصدمت بالبوست ده النهارده الصبح قبل ما انزل الشغل ولقتني بفتكر كلمات
لا يا مصري لا ولا
لا والف لا
تهجر بلدك وتسيبنا
بلدك بيك أولي

لا يا مصري لا لا
لا والف لا
ليه تهجرنا وقلبك يقسي
ليه تبعد وحبايبك تنسي
ليه يا ابن بلدي ليه

قلت لنفسي لازم اعلق واقوله لا.. اوعي تسافر..اصبر واشتغل وربنا هيكرمك وهيوسع رزقك

لكن اول ما نزلت من باب بيتنا لمحت العمارة اللي بتتبني قصادنا واللي الشقة فيها ب 750 الف جنيه، بصيت يميني لمحت العمارة اللي في الشارع اللي ورانا اللي الشقة فيها واقسم بالله انا مش ببالغ بمليون و100 الف جنيه

وافتكرت ال 65 جنيه اللي دفعهم الريس امبارح جمرك علي "كرتونة البلح" اللي بعتهاله الامير..افتكرت كمية الاستفزاز والفحش اللي بقت في الحكومة

افتكرت ان سعر الحديد هيغلي 2000 جنيه في الطن تاني عشان الاسعار تولع اكثر ما هي والعه

وقتها لقتني بصرخ واقول يقعد إزاااي ويصبر لأمتي
يقعد إزاي ويصبر لأمتي
؟؟؟؟؟

بص يا احمد

فكرة السفر مش مرفوضة طبعا ولا هي فكرة وحشة..احنا مأمورين بالسعي نحو الرزق..لكنها محتاجة تخطيط وادارة كويس

لو لسه في ابواب مفتوحة في طريقك..خلي السفر آخر الحلول لإنه مؤلم وخاصة للناس اللي بتحس وبتحب بلدها..خبط علي كل الابواب الاول قبل ما تأخذ قرار صعب زي ده

نصيحتي ليك

لو هتسافر..لازم تحط سقف وحد زمني للسفر..ما تسيبش الظروف وقتها تبقي هي الفيصل..لإن الموضوع بيكون صعب في الأول بس بعد كده بيبقي مغري وسنه بتجر سنة ورا سنة

لو هتسافر..سافر بس ما تهاجرش..اعمل حسابك إنك هتحتاج ترجع بلدك..ولو بقي معاك كنوز الارض هتفضل دايما حاسس من جواك انك اتقطعت وانكسرت

لو يا احمد شغلك مستقبله مبشر وفي أمل إنه ان شاء الله هتترقي في خلال كام سنة..اصبر واشتغل وربنا هيكرمك..ولو علي الجواز اخلص النية وربنا هيرزقك باللي تصبر معاك..وعلي ايه حال رزقك هيجيلك هيجيلك..إنت لو ليك نصيب تشرب نقطة مياه في مكان مش ممكن حد غيرك يشربها

مشكلة السفر غالبا بتكون حاجتين

ان بيكون من الصعب انك تلاقي شغل تاني لما ترجع ..أو بتضطر تبدأ من الاول وبالتالي بتضطر تسافر تاني غصب عنك لانك بتكون اتعودت علي حياة معينة خلاص. والمشكلة التانية بتكون طبعاً التأقلم والغربة اللي بتخلي الناس يقسموا ان حتي العيش بيبقي طعمه مختلف

أنت مش محتاج إني أفكرك بالاستخارة
لكني هوصيك بحاجتين

ادعي كثير: اللهم دبر لي فإني لا أحسن التدبير

واستغفر كثير علي قد ما تقدر: استغفروا ربكم إنه كان غفارا يرسل السماء عليكم مدرارا ويمددكم "بأموال" و"بنين" ويجعل لكم جنات ويجعل لكم أنهارا

هدعيلك إن ربنا يهيئ لك من أمرك رشدا ويهدي قلبك لما فيه الخير
ويرضيك ويراضيك ويجبر كسرك

توكل علي الله وسيب ربنا يختارلك

بعتذرلك جدا جدا جدا علي الإطالة

إيمان

بنت الاسلام said...

قد يكون السفر حلا

قد يكون وسيلة

للتغيير


للنماء


للاكتشاف عالم اخر


ولكنه بالتاكيد


ليس طوق النجاة


ولا مستقبل الغد


ولكنه ربما يكون حلا

مختلف باختلاف الظروف


والملابسات


لا تسال احد سوي


نفسك


ضع كل شيء امامها


ودعها وحدها


تقرر مصيرها


طائرة


ام


بقاء


تحياتي

د/اجدع بنوته said...

قصيده بتوجع اوى

بس برده

هنفضل نقولك سافر .. تصحبك السلامه

حزيــــــــــــــــــن said...

زمان ملحقتش اودع محمد وهو مسافر
ارجو ان الموقف لا يتكرر معاك

وتسألنى ما هو الوطن
اقول لك
الوطن بداخلى ذكريات مع اشخاص احببتهم
الوطن هو بتاع الشاى اللى على النيل وانا قاعد معاك
هو عربية الفول اللى فى ميدان عبد المنعم رياض
هو سور الكليه
هو باب زويله والمماليك
معكم عرفت معانى كثيرة للوطن

صديقى لن اؤثر عليك بكلماتى فأنا لست فى موضع السفر لأختار
ولكن سأطلب منك شيئان
ان تحتضن محمد بقوة اذا قابلته وتهديه ذلك الحضن
وان تجعل موعد سفرك مساءً حتى يتسنى لى ان اودعك
احمد مهنى

عروسة ننوسة said...

بجد جميلة جميلة الى ابعد حد....انت مش كاتب قصيدة انت كاتب حكم...تحياتى لك

عروسة ننوسة said...

اذا كنت متردد فى موضوع السفر استخير ربنا اولا....ثم تناقش مع نفسك ثانيا هل السفر سيحقق لك ما تتمناه ..اذا كانت الاجابة بنعم فلا تتردد ...للاسف الحياة هنااصبحت صعبة للغاية...بس المشكلة اننا هنخسرك وجودك بينا...

Ahmed Al-Sabbagh said...

رائع رائع رائع

بيعجبنى شعرك اوى اوى يا احمد

اقسم بالله نفسى من كل قلبى الاقى لك ديوان فى السوق عشان اشترية واقرا منه كل يوم

وطبعا هحفظ القيدة عندى ضمن الاعمال المختارة اللى بحب اقراها دايما

اما بالنسبة للرد على مضمو البوست

من فكرة السفر

اسمحلى اقول الكومنت بتاعى فى التليفون

وطبعا لو فكرت تسافر انا هغتالك

احنا ما نقدرش نستغنى عنك بجد

احمد

دنـيـا محيراني(ايناس لطفي said...

ازيج يا احمد و الله انا هاقولك راي بمنتهي الاتزان و التروي هحاول اهم شيء انك انت الوحيد الاي يقدر يجاوب عن الاسئله و يتاخذ القرار السليم انت قعد مع نفسك قعده صريحه وحدد انت عايز ايه بالظبط
عايز الفلوس عشان حياتك و مستقبلك و لا ؟ هاتستحمل الغربة ولا انت مش قدها ؟ هاتقدر تسيب الناس و المكان و المشاعر و لا ؟ وهل المال و الجريء وراءه يستحق المعاناه ؟و احتياجك له هو السبب ؟ ماهو المال هو سبب السفر ديه حقيقه لا تخفي عن اي واحد عايز يسافر تكوين مستقبل و اسره وهكذا
وممكن تكون تجربه تخوضها و بعدين تقدر تحكم عليها بسهوله لما تكون فيها وتشوف نفسك عامله ايه فيها محدش هايجبيرك علي الاستمرار
لازم تقعد مع نفسك وتحدد انت عايز ايه بالظبط و قدراتك ايه و محتاج الي ايه
ربنا يهودك للخير يا خي العزيز
هافتقدك جامد اوي يا انسان يا بشر
كلمني واقولي وصلت لايه و لازم اشوفك قبل السفر عشان اسلم عليك يا اخي الصغير
سلام

smraa alnil said...

كنت عارفة انك جامد

بس انت طلعت اجمد ما كنت اتخيل بجد


بص يا احمد

كتير اوي الغربة جوانا
بتصارعنا
وبنصارعها
حتي لو عايشين في بلدنا

الغربة معانا
مش مفارقانا

الفكرة ان تختار انهي غربة

هي كدة كدة مش فارقة

احكيلك حكاية بسيطة
عن بنت صاحبتي كانت حويطة

كلنا عيش وملح كتير
والحياة بينا كانت حلوة كتير
والضحكةمن قلوبنا صافية كتير
والاتصالات بينا كانت كتير

نهايته سافرت ورا لقمة العيش
تلبس هدوم نضيفة بدل لبس الخيش

ومن يوميها اتغربت
لا بقت هي هي ولا انا انا

والفلوس من قلبها اتمكنت

وفكرة الغربة عليها سيطرت

المهم ان اللي بيروح مش هيرجع

ولو رجع مش بيبقي هو

ومحدش يقول انا مش هتغير

بحسبة بسيطة واستخارة
قرر

يا جامد

Anonymous said...

سلام عليكم
ازيك يا ابيه احمد :)
مش عارفه اعلق على القصيده ولا على اللى ورا القصيده ..
القصيده اكيد كالعاده وزى ما سعادتك رايك فى نفسك كده ان اى حاجه بتعملها
تبقى ... فانا كمان راى من رأيك
:)

موضوع السفر ده بقىىىى ....
فى رد ضمن الردود موضوع باسم مدونة واصطنعتك لنفسى .. عاوزه اقولك يا احمد انى كنت هقولك نفس الكلام ده تقريبا بالظبط ..

السفر غربه و اكيد صعب مايحسوش الا اللى مجربه..تجربه شاقه بمعنى الكلمه صحيح
بس تعالى بقى نقارنه بقعدتنا فى حضن الوطن فى الحاله اللى هو فيها دى..
ضياع..انكسار..خوف..اهانه ومليون حلم بيتوئد
يعنى غربه بردو
بس الغربه جو الوطن أوجع وابشع من الغربه براه
لان غربتك بره على الاقل بتخليك تشتاق لحضن وطنك وتعرف تحبه بجد
لكن غربتك جواه بتخليك كاره البلدو ناقم على نفسك وعليها

انا شخصيا مش عارفه اقولك ايه
ما اقدرش اقولك لا اقعد وخليك فى بلدك وسط اهلك ودور بقى على شغلانه اى كلام "قبل ما القطر يفوتك"..
وبردو ما اقدرش اقولك بمنتهى البساطه يلا سافر اخلع اجرى إلحق ..
بس اللى أقدر أقولهولك أنى بجد بدعيلك واتمنى كل اللى يقرا كلامك او يعرفك يدعيلك
وانت استخير و أقعد مع نفسك واحسم الموضوع .
وأهم حاجه تاخد القار منظم وتبقى عارف انت عاوز ايه بالظبط ،

ياااااااااارب يا احمد يكرمك ويوفقك و ييسرلك ويقدرلك الخير حيث كان ويرضيك بيه.
يارب كمان تكون عرفت انا مين
اسفه على التطويييل

نبض اسكندرية said...

وكتير بيحكمنى السكات

اةةةةةةةةة هيا الحتة دى لو نبطلها

اكيد هانكون احسن بكتير

لو نبطل نسكت لو نقدر نتكلم

اكيد كان الوضع اتغير

جميلة جدا جدا جدا

الف مبروك على الحفل مع انها متأخرة شوية لكن متنساش انك تعمل مكان لتوزيع الكتاب فى اسكندرية لحسن الواحد هايموت ويقرى الكتاب

خالص تحياتى

د. إيمان مكاوي said...

القصيده جميله جدا ..أصلها جت على الجرح بس إحنا قررنا السفر...أي نعم في السفر فوائد..تحوش فلوس وتقدر تأمن نفسك إلى حد ما..بس بينساب مننا عمرنا من غير ما نحس بيه ولا يكون فيه أي ذكريات...إستخير وربنا يكرمك

Smr said...

مركب ورق
ضم فى جنابه
جنة سبأ
والكون خيال
فكرة
وأمانة...تحلمه
لو صعب تلاقاه على الملأ
اتخيله
فى مركب ورق
....

مركب ورق ده حاجة جميلة جدا
تستحق الاحتفاظ بيها
:)
تحياتى

Unknown said...

منكرشي انى انبهرت
بالقصيدة والحاةل نفسها وكله
ومنكرشي انى اتصدمت ف الاخر مش عارفه ليه؟
بس البلد دى احسن من غيرها
مش عارفه اقولك ايه
بس انا مبحبذشي فكرة السفر
مهما ان كان اهلك اولى بيك
وانت اولى بكل لحظة هتقضيها ف حضن امك جايز متجيش بعدين
تحياتى/ كركوبة

Unknown said...

ليه ليه ياعم كده بس البلددي احسن من غيرها
والله تعرفه احسن من اللى متعرفوش
واكلها بدقه فيكي يا بلدي
وعلى بلد المحبوب وديني
طيب دلوقتى ناويت
هجره داخليه زي ما احنا فيها ولا خارجيه
ولوخارجيه فكرت هتنتحر على شط ايه أرجع يا بوي بلدك ناطراك منتظراك يعني مش نطرتك بره

عين ضيقة said...

واضح جدا من القصيدة ان مسواك على كتير لدرجة ابهرتنى وده مش معناه انى ماكنتش مستنية المستوى ده ولا الجودة دى بالعكس


بالنسبة لموضوع سفرك مادمت كاتبه هنا فأنا رأيى انك تستخير ربنا وتشوف

وبعدين البلد اللى يضيق رزقك فيها دور على غيرها

وبرضو صلى استخارة وسلمها لله

دكتور حر said...

على رأيك

بص يا رياسة
على اللينك وقوللي ملاحظات حضرتك طبعا

http://www.4shared.com/account/file/50396916/485c6ce9/Hesar.html

أحمد سلامــة said...

وتفتكر حد عنده الحل السجري لموضوع السفر
انت بتسال في مشكلة جيل يا صاحبي
عموما احلى ما في موضوع السفر ده
القصيدة الجامده اللي كتبتها عشانه
:)
خد دي حته من ايام الفرفشة :
========
واصير في الغربة كالمساجين
وأخون الشارع المسكين
واسيبه للغريب يحكي
ويتحسر
وتتكسر
ليلاتي في غربتي ضلوعي
وفي نهاري
تخونني عنيا ودموعي
ويقتلني لشارعنا حنين
لنظرة بريئة في عيونك
وضحك الشلَّة في الشارع
كما المجانين
وصوت شقاوتنا في الدكاكين
ويفضل قلبي يتوجع
وأقول أرجع
وأخاف أرجع
ألاقي الشارع اللي في قلبي في الغربه
هنا موجود
في بلدي خلاص
مهوش موجود

التائب said...

بجد احساس جميل حب الوطن
بس ياريت الاحساس دة يكون فيروس وينتشر عند كل المصرين
والله الموفق

شهرزاد said...

تروح وتيجي بالسلامة يا أحمد ان شاء الله ويكون في السفر الخير ليك
والكتاب أمانة في ايدينا ان شاء الله

دكتور حر said...

يلا يا رياسه

قصيدة جارك الجميله اهي

http://www.4shared.com/account/file/50960563/78cd1cae/ghorba.html

Doaa Ebrahim Aaql said...

جيت قريتها كتير ومش عارفه اسيب تعليق
يمكن لو مكنتش قلتها لنا امبارح
فى الجو ده وفى الظروف دى
كنت عرفت اعلق

كان نفسي اقول لك متسافرش
بس مقدرتش
لكن زى ما قلنا لك
انت حققت حلم ناس كتير اوى
حلم اكتر من 40 مدون
وفرحتهم واسعدتهم
وجمعت ناس يمكن مكانوش يشوفوا بعض ابداً

وزى ماعملت كده
ربنا يحقق حلمك ويسعدك
وترجع بالسلامه
واوعى تخاف ترجع
زى ما قال لك سلامه
لأ ارجع
هتلاقى الشارع موجود
وهتلاقينا مستنيينك فى نفس المكان
مااتغيرناش
يمكن مش بنفس الملامح
لكن بنفس الحب والود والاحتواء
وكل المشاعر الحلوة اللى اتسجلت فى الصورة
الصورة اللى طلعت حلوة اوووووى

....

وهتوحشنا أووووى

!!! عارفة ... مش عارف ليه said...

أحمد
دي أول مرة اعلق عندك هنا لكن اسمح لي
هقولك كلمتين
مش على القصيدة لانها غنيه عن التعليق عليها والدليل التعليقات اللي سبقتني

بالنسبة للسفر
شوف أنا واحد مسافر
وكنت هموت وأهج زي كل الناس
لكن في حاجتين هقولك عليهم
بالنسبة للفلوس أيوة انا معاك هيكون مستقبل افضل وتقدر تحقق حاجات كتير
مش كل أحلامك طبعا إنما هتقدر تحقق ولو الحد الأدني

الحاجة التانية
وهي نقيض السفر إنك بتخسر مكانك في بلدك كل علاقاتك بتموت بتتحلل ويببقى زيك زي الجماعة اللي بينزلوا يزروها للسياحه وتتعامل نفس معاملتهم ولو جيت في يوم تفكر ترجع هتلاقي أن فاتك كتيرررر اوووي وبقيت مفصول عن كل اللي حواليك بقيت في كوكب تاني

فالمعادلة صعبة والاختيار اصعب
أقولك اتكل على الله واخلع
لان بعد كده لو حبيت تخلع يمكن متعرفش

تحياتي

Unknown said...

لايامصري
لا لا
لا والف لا
تهجر بلدك وتسبنا بلدك بيك اولي
ههههههه
صح ولا اية
الغربة زي ما قولت
انتحار
لمن اتخذ القرار
فلك الاختيار
واسئل مجرب
ولكن لو فترة مؤقتة وهترجع تاني او مثلا دراسة او كدا فا ربنا معاك
لكن تقيم
لا والف لا
نصيحة اخوية
سلام
مني

Anonymous said...

راحل بس راجع تاني
لم اشتاق لوداع أحد قبل السفر مثلما أشتاق الي توديعك

في السابق كان هذا الاشتياق لأبي

أنتظرني لا المسافر لاينتظر احد أنا الذي سأسابق الزمن حتي الحق بك يا أخي

unknown said...

ازيك يا استاذ احمد

اتمنالك انك تحقق كل الى بتتمناه من السفر
وترجع بلدك بالسلامه

Anonymous said...

مركب ورق .. قارب نجاه

مايشيلش غير قلبين وبس

او بالكتير قلبين وحبّارة وورق

او بالكتير .. حلم الحياه

تحفة يا احمد
تعبيراتك القوية الخاطفة لسة ساطعة وتشد

تحياتي

كتابنا said...

اللى عنده اى كتاب قرأه او عجبه فى اى جزئيه يرسلها عن طريق الايميل اى قصيدة


شعريه اى حاجة قرأتها وعجبتك ارسلها وأكتب اسم الكتاب واسم المؤلف

أميرة محمد محمد محمد said...

الشاعر العظيم اخيرا كشف عن شخصيته معلش اصلي بقيلي 3شهور ماكنتش بدون فيهم ويبدو ان تغيرات كثيره حدثت
مبروك علي مدونات مصريه للجيب واعتقد ان انت والاخ احمد مهني المفروض يبقي ليكم كتاب خاص ليكم ربنا معاكم
اما بالنسبه لموضوع السفر فليس من الوطنيه ان تظل جالسا في البلد غير قادر علي المساعده في شء في حين انك لو سافرت تفيد البلد اكثر ليست المشكله في السفر انما المشكله ان اللي بيسافر بينسي البلد دي وبيرجع ناقم عليها لو حطيت نيه انك تفيد مصر يبقي سافر لو ده الافضل
صلي صلاة استخاره وباذن الله ربنا يوفقك لما فيه الخير

امواج said...

كلما دخلت مدونتك وقرأت كلماتك اسبح بداخلها بشكل غريب
لها طابع غريب فعلا
اما السفر
فواضح انه اصبح قدر على الجميع
اصبح هدف لاننا هنا اصبح لا هدف لنا سوى البحث عن لقمة العيش
ورغم عشق الارض
وحب الوطن
الا انه لا مفر من السفر

انا لم احلم بالسفر يوم ولم اتخيل ان اترك يوما هذه البلد ولم اتصور كيف يأتى يوم امشى فى طريق لا يكون نهايته النيل
ولكن القدر سيجعلنى اعيش الكثير والكتير من عمرى فى ارض ليست ارضى
ولكن سيظل الحلم ان ارجع هنا مره اخرى واحقق احلامى
سافر
نعم سافر
من اجل ان يأتى يوم وتستطيع ان تأتى هنا لتحقق احلامك
فصدقنى لا تستطيع تحقيق اى شئ هنا الا بالمال
للاسف

radwa said...

السلام عليكم ورحمة الله وبركاته

داحله بس اقول مبروووووووك على الكتاب

الف الف مليون مبروك

صدقا والله الخبر فرحني جدا جدا

الف مبروك يا استاذ احمد

ومن نجاج الى نجاح وتقدم دوما

maha zein said...

انت فين يا احمد
ربنا يرجعك بالسلامة بقه
ابقه طمنا
هه
لاني مش عرفة اطمن من مين
ولا من بوهنا

بجد
انيون هاسيو...طومانايو
شون مالو نانن طو مانا يو

Unknown said...

واديك رسيت وسافرت هتوحشنا بجد يا بوهى

ابقى طمنا عليك

r said...

شوف السفر زى اى قرار مصيرى لازم تكون عارف مساوئه ومميزاته
بالنسبه ليك لو المميزات افضل يبقى تتوكل على الله
طبيعى فى السفر 10 فوايد – انا مش عارفاهم كلهم طبعا
بس اولها انك تشوف ناس جديده ومكان جديد
بلاد الله واسعه زى ما بيقولوا
واهى تجربه جديده تأمن نفسك وتحسن من حياتك
ان شاء الله
حاليا اكيد السفر بقى هدف تقريبا كل الشباب حتى الشابات
الكل عايز يسافر
ربنا يوفقك

نـــــــور said...

كلماتك رائعة كالعادة .. اعتقد انني لو علقت عليها قد انقص من جمالها .. الصمت وتأمل الكلمات هو كل ما استطيعه

ربنا ييسر لك الخير ويكرمك يارب .. اعتقد انني قرأت البوست منذ فترة وعلقت لكن لا اجد التعليق ؟

خيرا ان شاء الله

لا ادري لماذا دوما صفحة التعليقات هنا بتكون .. مهنجة جدا جدا بكتب التعليق بطلوع الروح .. المشكلة من عندي؟

Anonymous said...

good blog


thx