Sunday, May 11, 2008

على حافة الحلم






الحلم جواك ابتدا
يلعن فى اوجاعك دواه


الحلم صوت بيردّدك
لحظة ما بيردّد صداه

الحلم موت
وبينتهى فى الحلم موت
لحظة ولادة الف الف من الامل
انا مهما موتنى الخجل
بردك هعيد للحلم دقات الحياه




*****


انا حلم بيصارع خطاه
لحظة مرور المستحيل

انا نبض تاه
عاشق فى ضعف الناس مداه
انا خوف غريق
انا بحر صمت بيبتدى يجرفنى موجه لمنتهاه
وسط الطريق


****

انا شوق محال
انا نبرة الصوت العليل

لحظة ما بيموت الخيال
انا شوك فى ضهر الاحتمال
لأ مش كده!؟
انا حلم عاشق للقلوب الطيـّبه
لأ مش كده!؟
انا دمعة صعبة قريـّبه
لأ مش كده!؟
انا قصدى لما بيبتدى فى الحلم خوف
بيتوه حروف
كل اللى كان نفسى اكتبه
انا حلم بيدور المدار
جواه ضمير بيأنبه
جواه سكون
انا شوق بيعشقنى الجنون
انا مهما اكون .. بردك اسير الامنيه

لأ مش كده!؟

....انا قصدى ايه
انا قصدى غير كل اللى فات
انا حلم مات
مــ الضحك يمكن
بردو يمكن مــ السكات
وبيتولد مع كل موتة حلم
حلم
رافض يموت ......
رافض يخبيه السكات .......
وبيتولد مع رجفة الخوف والممات
احساس عنيد
بيصارع القلب اللى ملياه الجروح
وبيرمى اوجاع السنين
على كل الوان الطموح
ويتـــوه مع نبض الوريد
وبيجبر الخوف اللى ساكن ضلمته
يحلم .. يكون فى العمر قلب
يحلم .. يكون فى القلب حلم
يحلم.. يكون فى الحلم نبض جديد






احمد البوهى

10 comments:

Anonymous said...

أنا أول تعليق
محصلتش من زمان

معلش على الغياب يا باشا
بس اللي لقيته الفترة الاخيرة كان جميل
الفاظك قوية قوي
وقصايدك بتزداد تماسك وحرفية

استمر

حمامة said...

وبيتولد مع كل موتة حلم .. حلم
وبيتولد احساس عنيد
بيصارع القلب اللى ملياه الجروح
وبيرمى حمله على الطموح
ويتـــوه مع نبض الوريد
وبيجبر الخوف اللى ساكن ضلمته
يحلم يكون فى العمر قلب
يحلم يكون فى القلب حلم جديد


ايوة كده
لازم نحلم رغم الخوف
رغم الجرح
رغم الظروف
رغم كل حاجة

جميلة يا احمد
هايل :)

د. إيمان مكاوي said...

كلام في منتهى الروعه
زعلانه لأني معرفتش المدونه دي من زمان أنا كمان بكتب لكن حاجات على قدي ياريت تشرفني بالزياره وتديني رأيك

د. إيمان مكاوي said...

عايزه أسأل سؤال ويا ريت تجاوبني عليه لأن محدش فادني
إزاي أحفظ حقوق النشر ..ولك جزيل الشكر

امواج said...

بجد اسلوبك رائع ومميز
لدرجة انى لو سمعته بره المدونه بتعتك
هعرفه
بالتوفيق يارب

maha zein said...

شاطر
جدع
حلوة موت
ربنا يكرمك
ويوفقكوا في الي بتعملوه
ولا مش هدعي خلاص
انا استلمت مهمة تانية
علي فكرة انا مش هبلغ حد عن يوم الخميس
ععشان متقولوش اني بنفض
ولا تتحججوا بيا
انا معييش رصيد
والي عاوز اعرف الناس
يشحنلي بقيمة 300 جنية كده
تحياتي للبوست لارائع ده
المدونة دي انا اول مرة ادخلها ولا ايه
ولا ايه؟

Unknown said...

انا حلم مات
مــ الضحك يمكن
بردو يمكن مــ السكات
وبيتولد مع كل موتة حلم
حلم
رافض يموت ......

تعرف لو حبيت اعرف نفسي ف سطور
مش هلاقى افضل منك كلماتك دى
رائع
انت نجحت انك تمس قلوب كتير
تحياتى/ كركوبة

د/اجدع بنوته said...

يخربيت جمال كلامك ياشيخ

احساسك عالىىىى

حتى ف حزنك

ف حبك

ف كرامتك

ف فراقك

كله عالى عالى

أميرة محمد محمد محمد said...

علي فكره انا ساعات بقرأ شعر حضرتك ومش بعرف ارد بالكلام
انا بحس بس بالحروف وهي بتعانق السطور وبتلاقي صدي جوايا لكن مش بعرف اعبر بالكتابه
بحس انها حاجه اكبر من الكلام
ده حلم حاسه ان التدوينه دي خليتني اعيش في حاله سرياليه
يعني خليتني في حلم انا مش فاهماه بس حاساه
زي مابتصحي من النوم وقلبك متأثر بحلم لكن عقلك مش فاكره
اعتقد ان كلام زي جميل ورائع بقت كلمات مبتذله قوي في للرد علي كلام زي ده

sabey aly said...

الله عليك