Thursday, October 14, 2010

آخر قصيدة حزن




إنى تجاوزت الظنون وصرت أهون ما أظن

ولقد تملّكنى الأسى واغتالنى جرح الوطن

يا أيها الجلاد اقبِل وإتخذ

من ظهرى العريان ... قـِـبلَة سوطِك المكلوم

واضرب لا تضن

يا أيها الشيطان اقبل كى اميتك ألف مرة

كى لا اخون تمردى كى لا أحن

فالقلب عريانٌ كظهرى نادمٌ

وانا كذلك نادمٌ

متفرقٌ بين الكآبة والوهن

واصطفت الآمال في شغفٍ الى تحقيقها

فخذلتها

وتركت قلبي تائها

يبغي سبيلا بين أروقة الشجن

وانا مش هجيب اللوم على الخوف م الزمن

ولا يوم هحن

ولا هبكي على شىء م اللي راح

قلبي اللي ياما جرح قلوب

مات م الجراح

فمتندميش

انا اصلي مش هقدر اكونلك غير مافيش

جواكي شوق مابينتهيش

وانا بنتهي

بيتوه شراعي ومركبي

في بحر الحياه

ولا يوم وصلت لبرك الساكن بعيد

ولا يوم عرفت البحر فين آخره ومداه

انا زي موجك يا هوى

بيروح لحد الشط مفرود الجناح

وبينتحر حُر  برضاه

وانا مركبي لسّاها بتناطح هواه

كل المراكب من ورق يا بحر بتسافر بعيد

وانا زيها بعافر عنيد

بتحب فيك طعم الغرق

وتحب فيك طعم الحياه

فمتسأليش عن غيابي

وحالي في غيابك

ووفري عتابك

أنا كنت كدابك

وفضلت كدابك

أسرني فيكي الحنين

ومشيت ورا عتابك

ودخلت من بابك

وخرجت من غير قلب

حبك ذنوب .. مش ذنب

وانا ما احتملش عذاب

حبك امل كداب

بتذكر الحزن فيكي

وف صمت تنهيدك

انا خانّي تفكيري

وتعبني تفكيرك

وعشان أعوض

لقلبي حبك المهزوم

حبيت كتير غيرك

ولسه من غيرك

ماعرف طريق للرجوع

لو عارفة معنى السفر

اجمل ما فيه الدموع

..

..

الغربة ما سابيتنيش

وحلفت ما هسيبها

آخر قصيدة وجع يا حزن هكتبها

والوزن لو مكسور خدها .. على عيوبها

فصلّتلي توبها

وماسيبتليش اختيار

خمس سنين والقصايد

بتعيد في نفس المعاني

وبتعزف اللحن شارد

وتنوح على الاوتار

وبتعشق الاشجان

وتمجّد الاحزان

والحزن اصله جبان

الحزن ما بيبكيش

الحزن بيبكــّـي

والغربة مبتشكيش

الغربة بتشكـّـي

فمتسئليش عني

وتشُكّي وتظنّي

انا مش هخاف منك

انا بخاف مني

انا لست دون الهوى لكنني نَــدِمٌ

فالعشق فيكي تفرقٌ

والهجر فيكي كما اشتياق

سأقاوم هجركِ رغما عنّي ولن اشتاق

واقاوم هجر البسمة من وجهي

خشية املاق

سأقاوم كل صنوف الهجر وأي فراق

سأعود إلى نفسي يوما

وأعانق فيها الحلم واهرب

من صمت الاوراق


ـ أحمد البوهي

5 comments:

Nirvana said...

رائعة

Ahmed Faissl said...

مذهلة يا بوهي
نقلة الفصحى للعامية بنفس الوزن والمستوى والأسلوب شلّت دماغي لمدة دقيقة مثلا :)

iـــــــــــsــــــــــlــــــــــــaـــــــــm said...

الله عليك يا فنان
وحشتنا اوى والله
انا مش هتكلم عن القصيده
لأنها من اروع ما تكون
وميكفهاش كلام
يكفينى اكون تعليق عندك
واتمنى انك متغيبش علينا كتير
تحياتى ليك

كلمات من نور said...

جميلة اخر قصيدة حزن

تسلم إيدك

Tarkieb said...

الله ينور