Tuesday, October 7, 2008

أنا وانتى

ــــــــــــــــــــــ



دى آخر مرة هكتبلك

ودى نهاية قصايدنا

انا وانتى زماااان كنّا

ودلوقتى بنستمتع بغربتنا

بعيد عن بعض

وبـلمح شوقك المكبوت

وأحلام اللُقا والبُعد

بقول أنسى

اللاقى الذكرى بتحاصر سكون الليل

واقول أنسى

اللاقى القلب بيعاند

ورافض لو يكون صامد

بكون صامت .... بلاقى ان الحنين بيثور

ولو يفضل ما بينا السور

هنستمتع وهنحاول نعاند بعض



***



انا وانتى برغم البعد والفُرقه

بنتحجج بأى كلام

يعيد لحظة لُقا تايهه

وبتحاوطينى بدروبك

فاغيب عنك

لان دروبك التايهه

سبيلى للهروب منك

دى آخر مرة هتذكر

وآخر مرة هكتبلك

أنا وانتى برغم البُعد والفُرقة

شِباك الغيرة حاوطتنا

ويسألنا الحنين نهرب

نقول بالكدب مش فارقه

ولحظة صبر خلتنا

نجاوب صمتنا بالصمت

وبَعد البعُد

أنا مابغيرش من غيرى ... اكيد بكدب

اكيد وانتى اكيد لسّاكى بتغيرى



***



انا وانتى برغم البُعد والفُرقة

ساعات بنحن ونصالح

ثوانى الذكريات والتوه

أنا وانتى فى وهم الممكنات بنتوه

بيحدفنا الامل عالخوف

ويجرفنا الحنين للعند

وحيرة صمتنا فاقت حدودها بجد

لنرجع تانى للذكرى لـَنمحيها

ونستكمل طريق البُعد

لا دا ممكن ولا ممكن هنبقى لبعض



احمد البوهى
ــــــــــــــــــــ

16 comments:

بنت مصريه said...

يا بوووووهى يا جااااامد

ايه الجمال دا يا احمد لا بجد احييك على احساسك قبل كلماتك

وكل سنه وانت بالف صحه وسلامه

إبـراهيم ... said...

يااااااه يا بوهي ....

على قد ما إنتا وااحشني قوووي، وأنا عارف إني على طووول مقصر معاك ....

على قد ما القصيدة دي حلووووة قوووي

وفيها حاجات كثيييير حاسسها جدًا

ياااه يا أخي !!

واحشني بجـد :)

إرجع بقى :)

انا وانتى برغم البُعد والفُرقة
ساعات بنحن ونصالح ثوانى الذكريات والتوه
أنا وانتى فى وهم الممكنات بنتوه
بيحدفنا الامل عالخوف ويجرفنا الحنين للعند
وحيرة صمتنا فاقت حدودها بجد
لنرجع تانى للذكرى لـَنمحيها ونستحمل
ونستكمل طريق البُعد
لا دا ممكن ولا ممكن هنبقى لبعض

حلوة قوووي رغم قسوتها

قلب ينبض لله said...

يااه فينك من زمان
السفر بئي أخدك مننا
بجد أشعارك جميله أوي والواحد مفتقدها من زمان

بس انا ليه حاسة ان الكلام دا لمصر ما أعرفش ممكن يكون لحد تاني:)

كل عام وانت بخير وربنا يوفقك

حزيــــــــــــــــــن said...

وبتحاوطينى بدروبك فاغيب عنك
لان دروبك التايهه سبيلى للهروب منك

الجزء دا عبقرى
لأن دروبها اللى بتحاوطك بيها تايهه عشان مبنيه على عند وعدم مصالحه مع النفس

--طبعا فى اجزاء عبقرية تانى
انا لسه فاكرها من ساعة ما قولتهالى قبل السفر
-
الفونط اللى انت كاتب بيه يخليها شكلها مش قصيده خالص
-
مازلت عند رأى انك متنشرهاش بالرغم من انها حلوة اوى
انت فاهمنى

سلام يا صديقى

Miss. Sosa said...

السلام عليكم
اول زيارة ليه هنا ومنذهلة بصراحة

بس قبل مااتكلم ليك في النفاق ولا الصراحة عموما انا ماليش غير في الصراحة وماليش في سكة الغير معرف

بس انا كنت بشوف ردود انكسارات بتاع فريق المساندة فى منتدى عمرو خالد وكانت من الردود اللي بتقف في زوري بالعرض (معلهش هي الصراحة كدا مابتعرفش تلبس ماسكات)

بس واضح ان انكسارات بتاع المساندة هو انكسارات بتاع التدوين (والله اعلم)

فده يدعوني اني اقرأ هنا اكتر علشان واضح ان ده الريال فيس واعيد تشكيل صورة انسكارات بتاع المساندة في ذهني

وارجع اترك كومنت بشكل اكثر عمق وايجابية


تحياتي

Unknown said...

هنستمتع وهنحاول نعاند بعض


حلو قوى الكلام ده



واحشنا جدا

صَاحبْ البَوَابْه ... الحٌريةْ بالمَجَــانْ said...

جميل

تائهة فى أرض الأحلام said...

مبروك التجديد فى الموقع

وكل سنة وانت طيب



تحياتى لك

Jana said...

قوية الحيرة المتنقلة بين الكلمات
لتستقر فى النهاية بعقولنا

تحياتى

آيــة said...

بجد
بجد يعني
حلوة اوي
اوووووي


و حقيقية اوي
بنحبس نفسنا في اللاممكن
نلف في دايرته
منعرفش نخرج منها
و لا حتى بنحاول

نستسلم للعند
و نسيب ذكريات تحركنا

بنعمل كده ليه ؟

وصلني منها حاجات كتير اوي و حلوة اوووووي


تحياتي الشديدة
:)

فى القلب said...

حساس وأنسان كل كتاباتك مملؤه بما يمس الروح والأحاسيس

أستمتعت بمنتهى الشاعريه وأنا أقراء حروفك

أحمد سلامــة said...

ايه يا عم
انا ادخل اقرا امبارح اعلق تاني يوم الاقي تلات بوستات
؟؟؟!!!
whats up ??
ولا يهمك يا حاج

انكسارات .. احمد البوهى said...

بنت مصريه
ـــــــــ
كل سنه وانتى بكل خير
بس انا حاسس انك متحيزه لعيلة البوهى :D

ـــ ـ ـ ـ ــ

إبـراهيم ... معـايــا
ــــ
والله ليك وحشه كبيره ياابراهيم
وبشكرك عالسؤال .. انا متابع اخباراتك على فكره

ــــ ـ ـ ـ ـ ـــ

قلب ينبض لله
ــــ
ربنا يبارك فيكى .. القصيده مكنتش لمصر على فكره بس تمشى لمصر
:)


ـــــ ـ ـ ـ ـ ــــــ

حزيــــــــــــــــــن
ــــ
ياصديقى عمر الفونط ماهيفرّق بينا
تصدق انا ناسى انت مكنش عايزنى انشرها ليه ؟
ــ
ــ
ــــــــ ـ ـ ـ ــــــ

Miss. Sosa
ــ
نورتى المدونة
و عموما انكسارات بتاع فريق المسانده غيرى خالص هو اخ وصديق فاضل
واحنا الاتنين بنحب الصراحة جدا على فكره

ـــــ ـ ـ ـ ــــــ

محدش بيموت ناقص حلم
ــــ
ليك وحشه كبيره قوى يا محمود .. مستنى اشوف مدونتك بقى ؟
اسمها مميز جدا على فكره :)

ــــ ـ ـ ـ ــــ

انكسارات .. احمد البوهى said...

صَاحبْ البَوَابْه ... الحٌريةْ بالمَجَــانْ
ـــ
فكرتك مصطفى الحسينى صاحب البوابه لكن اكتشفت انها بوابه تانيه


ـــ ـ ـ ـــ


تائهة فى أرض الأحلام
ـــ
طال غيابك .. ربنا يكرمك ويبارك فيكى تحيتى

ـــ ـ ـ ـــ

Jana
ــ
الحيرة المتنقله بين الكلمات ... دى افضل جمله وصفت القصيده لتستقر فى زهنى
اشكرك


ـــ ـ ـ ـــ

آية مش هنا
ـــ
ربنا يعزك
بشكر لكى مشاركة روح القصيده
اشكرك


ــــ ـ ـ ـ ـــ

فى القلب
ـــ
ربنا يكرمك كالعاده تعليقك يزيد صفحة التعليقات بهاء وثقه ومشاركه واحساس


ــــ ـ ـ ـ ـــــ


أحمد سلامــة
ـــ
انت اللى بتيجى متأخر يااحمد وولا يهمك بردو
:)

ــــــــــــــ

شهرزاد said...

بجد أكثر من رائع
رغم جمال القصيدة ونهايتها القاسية
لكنها واقعية جدا
آلمني كثيراً هذا الجزء

لنرجع تانى للذكرى لـَنمحيها ونستحمل
ونستكمل طريق البُعد
لا دا ممكن ولا ممكن هنبقى لبعض

أسوأ شئ بعد الفراق هو الذكريات والحنين الذي يغلبه العند
سلمت يداك

سارة درويش said...

انا ماشية اخد كل شوية كوبي لجزء واقول دا الجزء الاروع كل شوية كل شوية بجد بجد كلها رووووووووووووووعة اوى ورشقت ف القلب