تمرد على المألوف ..... احيانا اكون بحاجة الى غلق الموبايل تماما والى الابد .. واحيانا احتا ج ان استأجر لانش وبأقصى سرعه انطلق به فى عرض البحر.. واحيانا اكون بحاجة الى لحظات جنون انعزل فيها عن الجميع واحيانا اجدنى فى حاجة لكتابة مثل هذا البوست !!؟
ــــــــــــــــــــــــــــــــــ
.
لو لم اكن مدونًا لوددت ان اكون ايه .. مدونًا بردو
ـــــــــــــ
المدونيين تلات انواع
..
مدّون بيدّون عشان يعيش
ومدّون بيعيش عشان يدّون
..
ومدون ميعرفش يعيش ولا يدوّن
غير لما يجيله تعليقات كتير
*******
شيطان محبط
ــــــ
الشيطان بيقولى كل ماأبص للمصريين ولحالهم وأتأملهم الاقيهم بيعملو حاجات اكتر من اللى كنت هقولهالهم
وكل مااجى اوسوسلهم اتلغبط
قلتله انت فالح تتشطر عليا انا بس دا انت كده تبقى بتستعبط
هو انا مش من المصريين؟
ولا من كتر مابقول الصين حلوه فكرتنى من الصين
اتارينى كل مااجى اقول كلمة حق او اكتب لأ
بسرح واقعد اشغبط .. حل عن دماغى يا عم دا انت شيطان محبط
**********
مغالطة
ـــــــ
فضلت واقف مستنيه بعد المعاد بساعتين ولمّا معرفش يجي بعتلى واحد شبهه سلّم عليّا واخدنى بالحضن وقالى ايه يا عم انت فين ؟؟ بصيتله بعين ونص وقلتله انت مين؟
قالى انت الدنيا غيرتك ولغبطت كيانك انت مش عارفنى.. انت مش عارف خيالك ؟؟ وسابنى ومرديش يجاوبنى وانا بسأله حتروح فين ..على فين؟؟؟
وما كنتش فى يوم اتخيل ولا يجيى على بالى انى امشى فى طريق وخيالى يمشى فى طريق تانى
*********
تعاريف تخاريف ..... اخبارهم من معتقل الحياة
ــــــــ
الشاى : يتحمل الماء المغلى ومابيصعبش على حد
القصب : كائن يتم عصره من اجل الاخرين
المروحة : كائن يلف حوالين نفسه وعمره مايدوخ
شاشة السيما : هى الحيطة الوحيدة اللى الناس بتقول عليها شاشه وهم فى كامل قواهم العقليه
المترو : بيمشى تحت الارض وراضى بنصيبه
********
ويبقى الشعر
(كلمنجى )
كلمنجى بيجرى ورا الكلمة
ويقولها ويجرى كلمنجى
*********
كلمنجى وسارح
فى مسارح احساس الناس
ومسافر فى بحور الكلمة لبر الاحساس
وبيرثى الشعر باشعاره وبيرثى الناس
كلمنجى معيّن على كل الابيات حراس
خايف عالكلمة تمل تكل
ساعتها تسيب البيت وخلاص
يحكم عالكلمة ما يبقلهاش فى الشعر اساس
كلمنجى
*********
كلمنجى بيجرى ورا الكلمة ويقولها ويجرى كلمنجى
*****
كلمنجى وشايل على كتفه قربة احزان
وتبصلة تلقاه باسم وتقول فرحان
والحب عامل مش عارفه وحلف ما يبان
حتى البيوت اللى كتبهاما فيهاش سكان
كلمنجى ويعشق فىالكلمة لحن الاوطان
كلمنجى
*****
كلمنجى بيجرى ورا الكلمة ويقولها ويجرى كلمنجي
******
كلمنجى وسارح بالكلمةعلى شجر التوت
كلمنجى وعايش عالكلمة والكلمة القوت
كلمنجى وملّ من الكلمة واهو سابها تموت
كلمنجى
****
كلمنجى بيجرى ورا الكلمة ويقولها ويجرى كلمنجى
*********
12 comments:
بوست جميل جدا ياحمد وبالذات فى حكاية تعاريف دة انا براد الشاى ساعات لما اقف قدامة بيصعب عليا اوى
تخاريف منطقية ..لاوضاع غير مفهومة .. وان فهمت فهي غير مرغوبة .. وان رغبت لن تنال
عجبتني جدا الحتة ده
تعاريف تخاريف ..... اخبارهم من معتقل الحياة
كل شيء مسخر لشيء اقسى منه ..طبيعة الكون البقاء للاقوى ..الا المصريين مسخرين لخدمة الاضعف وهو الحاكم الجبان
تحياتي لك
كلمنجى وملّ من الكلمة واهو سابها تموت
مش عاوزة ااقولك
انك خلتنى احس انى كلمنجية اد ايه
بس مش هنسى ااقولك ان مغالطة رائعة من الروائع يا احمد
كركوبة
ماشاء الله كل دي تخاريف أومال لو كنت فايق هتعمل ايه؟
شاشة السيما : هى الحيطة الوحيدة اللى الناس بتقول عليها شاشه وهم فى كامل قواهم العقليه
تخيل فعلا، احنا تطورنا بدل ماحد يضحك علينا بقينا بنضحك على نفسنا
"حل عن دماغى يا عم دا انت شيطان محبط"
يبقى أنت أكيد في مصر
.....................
"وما كنتش فى يوم اتخيل ولا يجيى على بالى انى امشى فى طريق وخيالى يمشى فى طريق تانى"
يعني جبت الغلط عليه شم انت اللي جيت بعد الميعاد بساعتين
..............
"كلمنجى وشايل على كتفه قربة احزان
وتبصلة تلقاه باسم وتقول فرحان
والحب عامل مش عارفه وحلف ما يبان
حتى البيوت اللى كتبهاما فيهاش سكان
كلمنجى ويعشق فىالكلمة لحن الاوطان
كلمنجى"
مافيش فايدة لازم تنكد على في الاخر
بس يجد روعة ماشاء الله
أكثر ما شدني في تدوينتك مقدمتها
بالفعل .. أحيانا يأتي على الإنسان لحظات يتمنى أن ينطلق .. أن يتجاوز الحدود .. أن يقفز فرحا أو ينهار بكاء أو يغضب غضبا هادرا أو يجن
نعم نعم .. ويا لها من لحظات :D
أعجبتني التدوينة و"كلمنجي" :)
دمت طيبا وفي أمان الله
البوست حلو يا احمد بس دى كلها تخاريف جبت الكلام ده كلو منين ياريت تنورنى فى مدونتى المتواضعه هستنا زيارتك
بوست جميل جداا ياريت تنور مدونتى المتواضعه هستنا زيارتك
مش عارفة ليه حاسة ان العنوان انكسارات مرتبط شوية بالبوست ده في عيني
مع انك قلت عنوانه خارج نطاق الانكسارات
بس عجبني اوي
الشيطان ونظرته للمصرين حلوة
والخيال اللي مشي لوحده
غريبة !! ممكن تحصل في يوم يا تري ؟
تحياتي
معلش اهي طاقه و طلعت في البوست
روق بقي
ايه الجمال ده بس
قمة والله
تسلم ايدك وابداعاتك
وكل سنة وانت طيب
:)
أحمد انت واحشتني قوي والله مافي شئ مخليني مش عارف اكلمك غير ظروفي
تصدق انا جيت هنا كذا مرة وكنت عاوزة اعلق على عم رزق
وبعدين معلقتيش ومشيت
مش فاركة ايه السبب
وبعدين تانى النهارده جيت ومعلقتش على رزق
علشان لقيت نفسى بقرا انكسارات
قمه فى الصلابه
ماشاء الله مبدع
متابعين ان شاء الله
Post a Comment