(1)
من لوعتك
يا ميت خسارة عالحضارة
فى كل حارة فى حتتك
الفين فتك
يتفزلكوا
بكلام مانعرف منطقو
غلب الغناوى فى صنعتو
غلب الغلابة بحنكتو
ويفبركوا
كل المشاكل والحلول
زمن اللى ساكت يبقى عارف
واللى مش عارف يقول
واللى مش قادر.. يحـــــــــاول
واللى بيحاول عـزول
والكــلاب على شط نيـــلك
الاصيل وابن الاصول
طال بكاه على دمعتك
يامصر إمتى تعــــــــود لنا
بين المعالم ضحكتك
يامصر توهــّنا الامـانى
وتـُهنا واحنا فى سكتك
ــــــــــــــــــ
والادارة والمنارة
والشموخ والاهرمات
سلام مربع للفنون ويّا الاغانى
والسهر والرقصات
فى كل عصر بنحتفل
ونقول سلام
سلام يرقــّص كل كلمة
فوق سطور احزان آلمنا
والمآمن واللى خانـّا
نتفق وياه بسلام
سلام يا مصر
فى كل عصر
بنتفق ونقول سلام
سلام يحل لنا المشاكل
للى مسئول واللى سائل
واللى نفسه يهد حائل
صمته يهتف بالسلام
سلام يا مصر
فى كل عصر
بعلو صوتنا نقول سلام
سلام مربع للقهاوى
والنوادى والرداوى
واللى غاوى
واللى ناوى
وبعلو صوته يقول سلام
ـــــــــــــــــ
فى بلدنا ماشى ومتغرب
انا بستغرب
لاعرفت انافق ولا بكدب
والهم تقيل
ياابوالمفاهيم متنور
اوعى تزّور
ان كنت مسنود بتعور
انا صبرى قليل
نازل تزور الانتخابات
تصبح ماتبات
تدفع لصوت الناس الوفات
يابو قلب عليل
الصحوة جت بعد معادها
فتحت بابها
ومصر خرجت بولادها
بصويت وعويل
بتقول كفاية اللى جرى لها
ووَقف حالها
كل الدول شايفه عـَدلها
الا العــــــــرب دايــما فى الديــل
الا العـرب دايما فى الديل
ــــــــــــــــــــــــ
تعثرتُ فى هذه الكلمات وانا اقلب بين اوراقى المتناثرة .. تلك الاوراق التى مر عليها سنوات من عمرٍ لا يتعدى يوما او بعض يوم .. لم اتذكر جيدا تاريخ كتابة كل ورقة على حده ولكنـّى تذكرت ما خلـّفته الايام من ذكريات حملت تلك الفكار
لم اتذكر جيدا متى كتبتها
ولكنى على يقين انها كانت تحمل (مــود) مختلف من الكتابة
مــــود جعل الكلمات بسيطة للغاية وجعل الرؤية العمرية للموقف ابسط
مــــود حمل مرحلة عمرية سابقة كانت نتائجا بقايا ابتسامة من نشوة الذكريات وبقايا
انكسارات تصارع عَنت الايام
ومقارنة بين اختلافات الرؤية العمرية.. ونتيجه.. أن المعنى يظل ثابتا رغم مرور السنين
احمد البوهى
ــــــــــــــــــــــــ
23 comments:
ونتيجه ..أن المعنى يظل ثابتا رغم مرور السنين
تسجيل حضور عند البيه الكبير
والباشا اجامد بجد
وعودة للتعليق بتأني ان شاء الله
يا مصر ماتت ضحكتك
من لوعتك
يا ميت خسارة عالحضارة
فى كل حارة فى حتتك
الصورة بتاعة البوست تحفة ومعبرة جدا جدا
سلام ليك وسلام لشعرك وسلام لأحساسك
دمت بكل ود وخير
العزيز انكسارات
هايل بجد
المود الى كتبت بيه هو مود المصرى المقهور على امه
وهو شايفها حافيه فى شوارع المدنيه
تحياتى
وعلى فكره السؤال عليك واجب اخوى لا يستحق الشكر
نعم لم يختلف المعنى كثيرا بالرغم من مرورو السنين
ثبات المعنى من ثبات الظروف
وثبات الظروف من النوع غير المألوف
لان لسه موجود على رقابنا نفس الخروف
;)
-------------------------
القصيدة رائعة
وعمرها الشعري اكبر بكثير من الكثير
وبها مرحلية ممتازة
سلمت يديك ياصديقي
شعرك جميل جدا ومعبر وصورك ايضا معبره شكرا لهذا الاحساس الرائع الاتى بتلك الكلمات
ماشاء الله
قلم رائع حقا
يبض بالصدق
والاحاسيس الجميله
اتمنى اتعرف على حضرتك
لانى انا كمان بوهى
من عائلة البوهى
واسمى بردو احمد البوهى
تمنياتى بلقاء قريب
احمد
اعترف
انت ايه علاقتك بصلاح جاهين
اعترف الانكار مش هينفعك
يا ريت ما تحرمناش من موهبتك الجميلة دي يا بطل
في انتظار الجديد دايما
بساطه وسلاسه وكلمة حساسة
بصراحة أنا اندهشت لما قلت ان الشعر ده قديم
لأنى توقعت انه مرحلة نضوج حصلت لك وجعلت كلماتك اكثر ابداعا
بس كدة انت باين عليك مبدع من يومك
على فكرة توقيتها حلو اوى متزامن مع الاضراب والحال الزفت اللى احنا عاشنه فى مصر الايام ديه
جميل جدا، وصافي قوي
ومش متأثر كثير بالمصنعية فطالع صافي
تحياتي
جميل أوى واحساس حضرتك ما شاء الله
:)
وكمان بيعبر عن حال عايشينه فى مصر وابسطها تزوير الإنتخابات
دمت متميزا
رائع يا أحمد
بجد انت موهوب
الى الامام يا بطل
تحياتى
احمد
احمد
زى عوايدك
كلماتك بتدمى قلوبنا
مصريات تدمى القلوب
تحياتى
ابداع
ابداع ابداع
كل كلمه وقفتني قدامها
الاحساس جميل ووصلني م قبل ما قرا
والقراءه اجمل تخليك تعيده تلات اربع مرات
ماشاء الله تبارك الله
افتقدت قلمك بغيابي
بجد يا اخي الفاضل انت فنان .. ربنا يبارك في قلمك وتعيشنا دوما الاحاسيس الجميلة اللي بتكتبها
تحياتي من قلب امتحاناتي
:)
لا تعليق اكثر من
رااااائع
.
.
وجميلة اكتر بالالقاء
;)
ايه الكلام الجامد ده
وانا هاروح فين بس وسط كل ده
كان معاك مصطفى لو لسا فاكرنى يعنى
ليه بتتاخر لعل المانع خير
اخي الفاضل
على مدونتي قصة بعنوان
عروس تزف إلى قبرها
للمبدع /مصطفى صادق الرافعي
لا ادري ان كنت قرأتها قبل ذلك
بس حقا ..لاتفوتك
لك تحياتي
تحياتي ياصديقي لك حالص تقديري مدونتك تستحق الاحترام
تحياتي
بشرى سارة الى رواد المدونات المخنوقين
لو مخنوق او عندك مشكلة اتفضل فضفض هنا علي الميل ده بميل مستعار ومن غير ذكر اسمك لو تحب وهنعرض مشكلتك علي مدونة اقلع همومك الي هيتم تفعيلها بعد نزول اول مشكلة فيها وهنخلي الناس تقول رأيها فى مشكلتك.
وهنستعين بأراء متخصصين اذا لزم الامر ...
استشير غيرك وشوف راى الناس ايه
راسلنا واكتب كانك بتكلم روحك محدش هيعرف انت مين
و الايميل هو
fadfad.here@yahoo.com او ادخل اعرف اكتر من مدونة انها الحياه http://www.enahaelhaya.blogspot.com
او من مدونة نورانيات
http://45days-repentance.blogspot.com/
ساهم في التخفيف عن غيرك بتعليقك علي مشكلته وايجاد حلول لها
من فرج عن مسلم كربة فرج الله عنه كربة من كرب يوم القيامة
او حتي خفف عن نفسك
يلا سارع عشان تفوز بلقب اول مشكلة في المدونة
انشرها لعلك تكون سببا في التفريج عن غيرك
يعني المفترض ان حضرتك كاتب هذه الشذرات وانت عندك كام سنه
الشعر الشعبي ماكنتش فاكره ان حضرتك بتكتب فيه بالتمكن ده
بس المشكله ان ده بيزود الفكره اللي كنت متخيلاها عن حضرتك واللي مختلفه كتييييييييييييييييييييير عن الواقع
مش عارفه كلام زي ده عايز ان حضرتك تبقي في ظروف مختلفه شويه عن اللي انت فيها دلوقتي
مش عارفه حضرتك هتفهم قصدي ولا لأ
Post a Comment