بقايا من خريف

لون الغيوم
ـــــــــــــــ

ماتت فى عين الناس
ملامح ضحكتى
وبينتهى اثرالسكوت
والخوف ملل
والصعب فى عيون النهاية
بيبتدى
ومرايتى رافضة تبصلى
وخيالى رافض
يبقى ظل وطيف حزين
.
.

.
.

كمـّـل سكوتك
وابتدى
قبل النهاية بكلمتين
تهمس بصوت بيموت
وتصرخ فى العدم
يمكن جراحك تنكتم
وتعيش على ظل السنين
بهتانة صورة بسمتك
والضحكة مفضوح سرها
بتجارى بيها الفرحانين
والعمر جنبك
سِـبحة مفروط حَبّها
والعين بيعكس ضلها
معنى الانين
.
.
.

كمل شرودك فى الحياة
واحجز فى عقل الناس مكانك
وابتدى الدور من جديد
السقفة هتهزك اكيد
بيزيد معاها المعجبين
وهتتقن الدور بالاوى
خليك قوى
واياك تخونك دمعتك
دى الناس بتعشق بسمتك
وسط الهموم
وانت اللى عايش وحدتك
بيزلزلك لون الغيوم
بيدوم مع صمتك صدى
بيردده همس الحنين
وبينتحر فيك الامل
والخوف ملل
والذكرى فى عيونك خجل
والموت بيخنق دمعتك
والشوق دفين
كمّـل جميلك قولّـنا
سر البراءة فى ضحكتك
او عرّف الناس انت مين
ترجم معالم صفحتك
قبل النهاية بكلمتين
.
؟

مجهول وبتحدى الزمن
والوقت بقى مِلك الشجن
وبقيت مثال للمجروحين

أحمد البوهى
ــــــــــــــــــــــ

اعتذار اراه واجبًا

.
.
.

الى كلِ من عَرفنى


والى كل من قدر له ان يعرفنى يومًا ما


... اليكم جميعًا


اعتذر ولأقصى ما تتخيلون


اذا كنت قد تسببت فى أى لحظةٍ كانت


أن يكون للانكسار طيفٌُ فى حياتكم


أو أن يكون الشجن أقرب اليكم من الابتسامة


وإنى لأرجو قبول الاعتذار


كما أرجوه منكم صالح الدعاء

.
.
.
.

ـــــــــــــــــــــــــــــــ
أحمد البوهى