Sunday, August 5, 2007

خاص بصديقى.. احمد مهنى

يا صديقى......ى

مع ان خريفك طبق الاصل خريفى
مش قادر اضيف تخاريفك على تخاريفى
موهوم
وبدور انا وانت فى دايرة قفلها الحزن علينا
وبنينا سورنا العالى اللى بيفصلنا عن العالم
وصنعنا لنفسنا عالم
عمره ما فكر فينا
يا صديقى
مع ان كلامك راسم صورة لكل همومى
وكلامى بيوصف نفس همومك
كل الاحلام اللى فى يومى واللى فى يومك
صبحت اوهام
يا صديقى اتغير كل كلامنا عن الاحلام
وبقينا فلاسفة فى كوخ اهوائـنا
بيحركنا امل مكسور
وبنستخدم كل ذكائنا
علشان نخدع نفسنا بيه
يا صديقى سؤال ..ويا ريت تجاوبنى عليه
احلامنا خلاص كلها ماتت
ولا اشتاقت ترجع تانى؟
يا صديقى انا عمرى ما هبقى انانى
ولا يوم حركنى غرور
ولا عمرى هبقى جبا ن
يا صديقى انا خايف يوم نستسلم للاحزان
الحزن بيقتل صاحبه
صدقنى يا صاحبى... انا خايف
نبقى انا وانت..
خيال انسان

البوست ده اهداء منى لصديقى احمد مهنى صاحب مدونة مزاج
http://mazaag.blogspot.com
ويا ريت تجاوبنى على سؤالى وتقولى انا ايه؟