Friday, May 30, 2008

أأسافر ؟؟؟؟؟؟؟؟؟؟


فلسفة التفرد والتردد والقرار .. !؟
ــــــــــــــــــــــــــــــــــــــــــــــــ









مين انت فى بحر الحياه

غرقان لشوشتك ؟

ولا ّ بتصارع لـُقا حلم الجنون

مين راح تكون؟

صّياد وسنّارة وشبك ؟


ولا ّ انشبك .. قلبك

بأوجاع الشجون

مين راح تكون؟

.
.

دا الشعر ... داااااااء

مَد البصر فى البحر بيصيب الانتهاء

عند البداية المُخجـِلة

صيّاد وعايش فوق خمول الأمنيه

صيّاد ورق

والمرسى ايه ؟
غير رمل ساكن صمته مستسلم جبان

والحلم ايه ؟
غير رجفة الخوف والامان
والضلمة ايه ..؟
غير جرح بيصيب السكون

مين راح تكون ؟؟

دا الملح عُمره ما يبقى حبر

مين راح تكون؟
.
.

مركب ورق .. قارب نجاه

مايشيلش غير قلبين وبس

او بالكتير قلبين وحبّارة وورق

او بالكتير .. حلم الحياه
.
.
ــــــــــــــــــــــــ
ــــــــــــــــــــــــ
ـــــــــــــــــــــــــ
ـــــــــــــــــــــــــ
ـــــــــــــــــــــــــ
.
.
وفى أغلب الأوقات بتـووه

وسط الهموم والممكنات

والصعب حلم

بيبتدى وقت الممات

وكتير بيحكمنى السكات

وقت الخطر

موصوف لأمثالى السفر

والخوف طريق

عايش على الموت بالبطىء
وخيال ضمير

او بالكتير

بقايا من مركب ورق



ـــــــــــــــــــ




عالهامش
ــــــــــــــ

لم أكن أعلم أن السفر تحول من كونه وسيله الى هدف...!!؟
ولم أكن أتصور عندما استشير الاخرين .. أجد الاجابة حاضرة سريعه ......( ساااااااااافر).. دى فرصة

لم أعد أعرف سأمكث هنا .... ام ستكون الطائرة هى آخر ما يرسى عليه عطاء وعناء التفكير؟؟؟
لم أعد أعرف ..؟




احمد البوهى
ـــــــــــــــــــ

Friday, May 23, 2008

ياااااااااااااااااااااااااه


على ضفاف حفل توقيع العدد الاول من مدونات مصرية للجيب
ـــــــــــــــــــــــــــــــــــــــــــــــــــــــــــــــــــــــــــــــــــــــــــ




احمد مهنى يمينا وانا يسارا.. فى نهاية يوم حفلة التوقيع


انا وصاحبى
ـــــــــــــــــــــــــــــــــــ







تعانق الكثيرون .... وعاشو لحظة من اجمل لحظات اللقا والتعارف والحب والود
.



.
بيعت كل النسخ فى سابقة نادرا ما تتكرر

نجاح صنعتموه انتم ..... واستطعتم ان ترسمو على شفتىّ ابتسامة من اعماق القلب
فلم تفارق الابتسامة وجهى وتغمدنى نشوة العمل من اجل المذيد
الى جميع المدونيين .. اليكم جميعا وبلا استثناء
ارقى تحية اجلال واحترام
أشكركم جدا والى اقصى ما تتخيلون

فأنتم أغلى حاجة فى حياتى الآن
.
.
.

اشكر كل من ساهم فى نجاح هذا الحلم ولو بكلمة طيّبة
اشكر فريق العمل الذى ضحّى بوقته من أجل تحقيق هذا الحلم
أما صديقى احمد مهنى فهو اقرب الىّ من كل الكلمات التى يمكن ان اكتبها عنه
فبدونه لم تعرف الفكرة طريقها للتحقيق


ــ



على ضفاف الشعر
ــــــــــــــــــــــــ









لسه الدموع فى عنيك بتصارع الاحزان

لساك ضمير مهزوم ..؟
لساك أمل خجلان


هوّن عليك


يكفيك

انك تعيش انسان
دا لا كنت آخر ضل نوره بينطفى


ولا كنت آخر شـِعر إحساسه إنجرح
.
.

لأ يا أنا



غلطان

دا أنا فرحااااااااااان

ودى دموع الفرح

ــــــــــــــــــــــــــ



احمد البوهى
ــــــــــــــــــــ


تغطية حفلة التوقيع عند الصباغ






Wednesday, May 14, 2008

اول خطوة فى طريق احداث ثورة ثقافية



ميلاد حلم
ــــــــــــــــ



وعدناكم

ووفينا بالوعد
.
كان مجرد حلم

لكننا اجتهدنا .. صارعنا كل الظروف والمحبطات


.كان الايمان بالحلم أعمق من أى الم

.أيام مضت لم ننم فيها

.. وايام اخرى لم نرى اهلنا ولا بيوتنا

حالة من الانقطاع عن الذات

ولكن فرحة تحقيق الحلم اعمق من أى شئ وأبقى

موعدناالخميس 22/5/2008 الساعه 6.30مساء

وسط البلد - ميدان التحرير -شارع طلعت حرب - مكتبة عمر بوك ستور

فوق مطعم فلفلةموعدنا مع انطلاقة حلم وميلاد جيل جديد من الكتاب والمثقفين

موعدنا معكم وفى انتظاركم


مع حفلة توقيع العدد الاول

من مدونات مصرية للجيب

******




أنا وصاحبى


جروب مدونات مصرية للجيب .. ..الفيس بوك





*****




وعد جديد
هذه مجرد خطوة .. نحو حلم جديد
انتظرونا ..؟؟





Sunday, May 11, 2008

على حافة الحلم






الحلم جواك ابتدا
يلعن فى اوجاعك دواه


الحلم صوت بيردّدك
لحظة ما بيردّد صداه

الحلم موت
وبينتهى فى الحلم موت
لحظة ولادة الف الف من الامل
انا مهما موتنى الخجل
بردك هعيد للحلم دقات الحياه




*****


انا حلم بيصارع خطاه
لحظة مرور المستحيل

انا نبض تاه
عاشق فى ضعف الناس مداه
انا خوف غريق
انا بحر صمت بيبتدى يجرفنى موجه لمنتهاه
وسط الطريق


****

انا شوق محال
انا نبرة الصوت العليل

لحظة ما بيموت الخيال
انا شوك فى ضهر الاحتمال
لأ مش كده!؟
انا حلم عاشق للقلوب الطيـّبه
لأ مش كده!؟
انا دمعة صعبة قريـّبه
لأ مش كده!؟
انا قصدى لما بيبتدى فى الحلم خوف
بيتوه حروف
كل اللى كان نفسى اكتبه
انا حلم بيدور المدار
جواه ضمير بيأنبه
جواه سكون
انا شوق بيعشقنى الجنون
انا مهما اكون .. بردك اسير الامنيه

لأ مش كده!؟

....انا قصدى ايه
انا قصدى غير كل اللى فات
انا حلم مات
مــ الضحك يمكن
بردو يمكن مــ السكات
وبيتولد مع كل موتة حلم
حلم
رافض يموت ......
رافض يخبيه السكات .......
وبيتولد مع رجفة الخوف والممات
احساس عنيد
بيصارع القلب اللى ملياه الجروح
وبيرمى اوجاع السنين
على كل الوان الطموح
ويتـــوه مع نبض الوريد
وبيجبر الخوف اللى ساكن ضلمته
يحلم .. يكون فى العمر قلب
يحلم .. يكون فى القلب حلم
يحلم.. يكون فى الحلم نبض جديد






احمد البوهى